പെരിങ്ങോട്ടുകുറിശ്ശി
ഗ്രാമപഞ്ചായത്ത്

പാലക്കാട് ജില്ലയിലെ ആലത്തൂര്‍ താലൂക്കിൽ കുഴല്‍മന്ദം ബ്ളോക്കിലാണ് പെരിങ്ങോട്ടുകുറിശ്ശി ഗ്രാമപഞ്ചായത്ത് സ്ഥിതിചെയ്യുന്നത്. പെരിങ്ങോട്ടുകുറിശ്ശി ഒന്ന്, പെരിങ്ങോട്ടുകുറിശ്ശി രണ്ട് എന്നീ വില്ലേജുകളിലായി വ്യാപിച്ചുകിടക്കുന്ന പെരിങ്ങോട്ടുകുറിശ്ശി ഗ്രാമപഞ്ചായത്തിന് 31.45 ചതുരശ്രകിലോമീറ്റർ വിസ്തീര്‍ണ്ണമുണ്ട്. ഈ പഞ്ചായത്തിന്റെ അതിരുകൾ കിഴക്കുഭാഗത്ത് കോട്ടായി പഞ്ചായത്തും, വടക്കുഭാഗത്ത് ഭാരതപ്പുഴയും, പടിഞ്ഞാറുഭാഗത്ത് തിരുവില്വാമല പഞ്ചായത്തും, തെക്കുഭാഗത്ത് കുത്തനൂര്‍, തരൂർ പഞ്ചായത്തുകളുമാണ്. 1954-ലാണ് ചൂലനൂര്‍, പെരിങ്ങോട്ടുകുറിശ്ശി, പരുത്തിപ്പുള്ളി എന്നീ ഗ്രാമപഞ്ചായത്തുകൾ ഉണ്ടായത്. 1962-ലെ കേരള പഞ്ചായത്ത് ആക്ട് ആന്റ് റൂള്‍സ് പ്രകാരം പഞ്ചായത്ത് പുന:സംഘടിപ്പിച്ചപ്പോള്‍ മൂന്നു ഗ്രാമപഞ്ചായത്തുകളേയും ചേര്‍ത്ത് പെരിങ്ങോട്ടുകുറിശ്ശി എന്ന പേരിൽ ഒറ്റ പഞ്ചായത്താക്കി. 1963-ലെ തെരഞ്ഞെടുപ്പില്‍ ഡി.നാരായണന്‍ നമ്പൂതിരിപ്പാടായിരുന്നു ആദ്യപ്രസിഡന്റായത്. ഭാരതപ്പുഴയുടെ തെക്കുഭാഗത്തായി ഉണ്ടായിരുന്ന 18 അരകുറിശ്ശികളിൽ ഒരു കുറിശ്ശിയായിരുന്നു പെരിങ്ങോട്ടുകുറിശ്ശി. ഭാഷാടിസ്ഥാനത്തിലുള്ള കേരള സംസ്ഥാനരൂപീകരണത്തിന് മുമ്പ് ഈ പ്രദേശം മദ്രാസ് സംസ്ഥാനത്തിന്റെ ഭാഗമായിരുന്നു. പരുത്തിപ്പുള്ളി, പിലാപ്പുള്ളി, മുടുപ്പുള്ളിത്തറ, ചേന്നന്‍കാട്, ഒടുവന്‍കാട്, കുണ്ടുകാട്, ചെട്ടിയന്‍കാട്, തുവക്കാട്, തച്ചന്‍കാട്, ഇരുവുളന്‍കാട് കോട്ട, കോട്ട ചന്ത, തോട്ടക്കര, എട്ടുടി, പെരുമല, മണിമല, മണിയന്‍പാറ, നടുവത്തുപാര മണ്ഡപത്തികാവ്, മണ്ണുവെട്ടുമട, തൃത്താമര, വടക്കുംപാറ, കിഴക്കുംപാറ, മേപ്പാടം, ചിറപ്പാടം, മാരിയില്‍, മേക്കോണം, പന്നിക്കുളമ്പ്, വാല്‍ക്കുമ്പ്, മരുതോണി, തോണിക്കുണ്ട്, അണിയത്ത്കുണ്ട്, കുന്നത്തുപറമ്പ്, തല്ലുപറമ്പ് എന്നിങ്ങനെ പുരാതനമായ സ്ഥലനാമങ്ങളുള്ള നിരവധി പ്രദേശങ്ങള്‍ ഉള്‍ക്കൊള്ളുന്നതാണ് പെരിങ്ങോട്ടുകുറിശ്ശി ഗ്രാമപഞ്ചായത്ത്